Xa está na rúa o novo cartel da orquestra PARÍS DE NOIA. Despois do anterior, que estivo vixente na pasada temporada e que creou certa polémica, a nova imaxe da PARÍS recupera o logotipo característico e os músicos e cantantes pasan ao primeiro plano.

Imaxe corporativa, compoñentes e unha vista do escenario, nada máis. Un cartel moi directo, sen as florituras da pasada campaña, pero que non por iso deixa de ser atractivo, vistoso e ben feito.

En primeira liña e nunha posición destacada, os cantantes, Genma Lareo, Christian Maya, Jessica Santín, a nova fichaxe feminina de PARÍS para 2010, e J. A. Blas Piñón. Detrás, o resto da banda noiesa. Agora agardaremos polo novo espectáculo, escenario, coreografías e máis cambios no repertorio, que é o realmente importante.

En Festa a Festa ofrecemos o programa da Festa das uñas, unha nova edición da exaltación gastronómica do barrio compostelán de San Lázaro. Destacamos a degustación nos locais da zona o vindeiro luns, coas racións a 5 € e a programación musical que comeza hoxe co grupo SAMBA e a orquestra COSTA OESTE e remata o luns coa Xira do Xacobeo da orquestra PANORAMA.

Unha terra de bo pan e bo queixo quere exaltar os seus produtos estrela. O queixo e mais o pan de Ousá están de celebración. E para iso nada mellor que poder contar cunha das mellores orquestras da orquestra galega nestes momentos: GRAN PARADA. Con este programa gastronómico e musical dificilmente pode fracasar calquera festa, porque os ingredientes son de máxima calidade para a festa de Friol.

XVIII FEIRA DO QUEIXO E PAN DE OUSÁ

DOMINGO, 21 DE MARZO DE 2010

PROGRAMA DE ACTOS

Ás 10:00 horas: Lanzamento de foguetes de artificio anunciando o comezo da feira.

Ás 10:30 horas: Asignación de Stands.

Ás 11:30 horas: Apertura da feira

Pasarrúas a cargo de: CHARANGOS de NEDA, CHARANGA de VILALBA e BANDA das ANGUSTIAS de FERROL, que continuarán ata as 14:30 horas.

Ás 20:00 horas: Comezo da Festa coa actuación da Orquestra GRAN PARADA

Ás 12 da noite: Remate dos actos desta XVIII FEIRA DO QUEIXO E PAN DE OUSÁ

DIVERFESTA é unha nova iniciativa da orquestra PANORAMA, que pretende ser anual, como agradecemento aos máis pequenos da casa. Unha festa pensada especialmente para eles con regalos, hinchables, karaoke, etc…

A que si se mantén é a festa de pola noite en Dena (Meaño). Alí actuará a orquestra PANORAMA acompañada de SINTONÍA DE VIGO no segundo día de celebracións. Mañá cerrarán o San Xosé CHARLESTON BIG BAND e GRAN PARADA, tal como informamos en Festa a Festa.

ACTUALIZACIÓN

Ao final a festa de pola noite en Dena tamén foi suspendida. Cando se coñeza a nova data de actuación informaremos de novo en Festa a Festa.

Por se non chegasen todas as citas festeiras das que informamos estes días, aquí ofrecemos algunha máis para a xornada de San Xosé. En Nantón (Zas) aproveitan para celebrar a Festa da Xuventude e non moi lonxe de alí, en Laxe, unha presentación de orquestras para 2010. En Carnes (Vimianzo) actuarán as orquestras AMÉRICA SL e SOLARA.

Estamos actualizando o calendario de celebracións coas citas festeiras para estes días. Intentaremos xa ir collendo o ritmo para ter ao día o calendario de cara ao verán. Somos conscientes de que é un apartado de Festa a Festa dos máis visitados. Saúdos e boas festas!

Non, hoxe non é o día dos inocentes. A cousa vai en serio. Con campás, uvas da sorte, cotillón e incluso a presenza de Belén Esteban… en Negreira celebran Fin de Ano por todo o alto, non falta nin a orquestra. Dúas a falta dunha.

As orquestras COSTA OESTE e PANORAMA aterran cos seus espectáculos hoxe en Negreira. A curiosa iniciativa, que non é nova deste ano, consiste en celebrar a fin de ano como se do 31 de decembro se tratase. Haberá uvas á 1:00 da mañá, cotillón, gominolas da sorte, etc… É imprescindible achegarse á praza do Concello vestidos de etiqueta.

A música comezará xa ás 23:00 horas e interromperase dúas horas despois para conectar coa Porta do Sol de Madrid. Todo tal cal o día propio de fin de ano. Polo tempo que vai ninguén diría que non estamos a cambiar de ano…

Para quen coñeza a capital do Barbanza como os nacidos alí ou outros a quen nos encandilou ata “adoptarnos” coma seus, non fai falta dicir que Ribeira está de moda. Pero para os que aínda non a coñecen abondo e queiran dar ese paso, na Centenaria estes días hai festa, como non!

Baixo o pretexto de Festas da Primavera Ribeira de Moda poderemos gozar de catro xornadas de verbena grazas á organización de comercios e hostalería.  Poderanse adquirir rifas en moitos locais de Santa Uxía para ter opción a sorteos de regalos moi interesantes.

E como resultado do esforzo dos locais comerciais e de ocio ribeirenses, podemos gozar de catro días de festa. As dúas primeiras verbenas serán hoxe e mañá, unha terceira o venres da semana que vén, e a última o venres 9 de abril. As orquestras son punteiras: PHILADELPHIA, ACHÉ, COSTA OESTE e CINEMA, e amenizarán as primeiras festas da capital da troula no Barbanza.

O de “capital da troula”, que acabo de sacar da manga, acáelle moi ben a Ribeira. Non en van é unha das localidades con máis festas do Barbanza, aínda que aquí de festas os veciños non andan mal tampouco. Para mostra esta fin de semana con celebracións en Bealo (Boiro), o San Xosé, e en Taragoña (Rianxo), Iª Festa da Xuventude.

E se nos cinguimos á capital do Barbanza, esta é só a primeira de moitas que virán, todas elas de sona: en breve a FESTA DA CHUVIA, en xullo a FESTA DA DORNA (de interese turístico galego), unha semana despois as FESTAS DO VERÁN (6 días de verbenas, atraccións e outras actividades festivas), e para rematar a SANTA UXÍA no mes de setembro. E todo isto sen meternos nas parroquias onde salientan as de Aguiño (mes de xullo) ou Palmeira e Corrubedo (agosto) entre moitas outras. Pero se aínda non nos chegan e queremos máis troula, aínda que non son festas estritamente verbeneiras, temos a Feira Mariñeira e Medieval ou os concertos do monte de San Roque, sen esquecernos da Festa do peixe e de multitude de citas musicais no Malecón durante todo o verán.

Desta volta informamos da primeira das citas festeiras en Ribeira: hoxe a orquestra PHILADELPHIA, que xa actuou nas festas do verán en 2009, e mañá a orquestra ACHÉ, coa súa nova xira.

ACHÉ quedará na zona despois de actuar na Centenaria, xa que é a encargada de amenizar a I FESTA DA XUVENTUDE de Taragoña xunto coa PARÍS DE NOIA, evento do que xa informamos en Festa a Festa.

Para a semana actúa COSTA OESTE, liderada por Javier Comesaña, que presentará novidades na xira 2010, e cerrará a CINEMA de Alberto Dopico en abril.

Irémonos acostumando, a partir da primavera no Barbanza sempre hai festa.

No Milladoiro (Ames), a uns pasos de Santiago, celebran o San Xosé cunha orquestra que está a ter moi boas críticas por parte do público: SUAVECITO. A formación musical de Espectáculos Lito presenta nesta parroquia de Ames parte do novo espectáculo que se está a preparar para arrasar no verán alá por onde vaian.

Novidades importantes no repertorio e algún cambio no escenario, moita música variada e espectáculo e bo facer por parte desta banda que por onde pasa deixa moi bo sabor de boca. Hai algúns temas arranxados especialmente para a orquestra, outros que son éxitos recentes nas fórmulas de radio e, como non, temas de sempre interpretados pola orquestra que levan selo indiscutible de SUAVECITO.

Mención especial para dúas cancións arranxadas e adaptadas ao galego, que poderás escoitar tamén no seu disco Mentalízate. En canto ao CD, será necesaria unha segunda edición debido ao éxito acadado o pasado verán por todas as festas de Galicia. SUAVECITO vai pegar forte esta temporada 2010, e para quen non o crea, falamos en decembro…

PROGRAMA COMPLETO

VENRES 19 MARZO
( SAN XOSÉ ) Lugar: r/ Costa Grande

10,00h. Disparo das 21 bombas de palenque anunciando o día do Patrón
10,00h. Misa
12,30h. Misa solemne
14,00h. Sesión vermouth coa magnífica orquestra SUAVECITO
http://www.orquestasuavecito.com/
17,00h. Apertura atraccións infantís
19,30h. Actuación cómico-infantil “OS SETE MAGNIFICOS MAÍS UN”
http://www.culturactiva.org/
21,00h. Verbena coa extraordinaría orquestra SUAVECITO
no descanso sorteo dun magnífico XAMÓN IBÉRICO.

ACTUALIZACIÓN

Festa suspendida por mal tempo. A actuación da orquestra SUAVECITO no Milladoiro terá lugar o próximo venres día 26.

Cartel de luxo para esta fin de semana en Dena. As festas da parroquia do concello pontevedrés de Meaño brillan con luz propia e xeran grandes expectativas de asistencia de público para ver a nova temporada de seis das orquestras máis demandadas nas celebracións populares.

MARBELLA e PONTEVEDRA serán as dúas primeiras formacións musicais. A primeira presenta o seu novo plantel de músicos e cantantes na zona así como as primeiras novidades no repertorio. Tamén a PONTEVEDRA ofrecerá novos temas dentro do seu estilo de orquestra bailable 100%. Nesta segunda orquestra apenas hai un cambio no cadro de músicos e a dianteira permanece sen alteración.

PANORAMA e SINTONÍA DE VIGO serán as que amenicen o segundo día de festas. Dúas “enche campos”, a primeira polo seu espectáculo sempre chamativo e música dirixida a todos os públicos e a segunda por estar considerada unha das mellores orquestras tradicionais de Galicia. En PANORAMA poderemos ver xa unha parte importante do novo repertorio e espectáculo, aínda que non está todo presentado de cara ao verán e pode haber sorpresas. Como xa informamos e é ben coñecido a estas alturas, na formación debutan tres músicos á parte das dúas voces femininas. Na SINTONÍA DE VIGO tamén hai un cambio importante: a incorporación de Pascual como teclista e responsable de moitos aranxos musicais para esta e outras orquestras. O repertorio desta formación musical é máis clásico que o de PANORAMA e nel inclúense pezas difíciles de escoitar noutras orquestras e maxistralmente tocadas pola dianteira que permanece igual que en 2009.

E a última xornada de festa estará amenizada por GRAN PARADA e CHARLESTON BIG BAND, dúas orquestras que poden presumir de colocarse nos primeiros postos da verbena galega. Na primeira hai un cambio na dianteira mentres que na segunda hai un único cambio nos músicos. Presentarán novidades en canto ao repertorio adiantando xa parte do que será o espectáculo preparado para este verán.

En Dena a festa vai ser todo un éxito e hai grande expectación non só no concello senón tamén nos arredores, como Vilalonga ou Sanxenxo. Se o tempo acompaña a asistencia vai ser moi importante.

No concello coruñés de Trazo, no lugar de Oa-Xavestre, teñen montada unha boa festa para o día de San Xosé: a XXI Festa da Queimada.

O día preséntase completo, pois xa haberá sesión vermú, pero o groso da festa será a partir da noitiña coa verbena amenizada por dúas grandes orquestras: LEDICIA ESPECTÁCULO de Ourense e FUNÇAO PÚBLIKA de Portugal, para moitos a mellor orquestra do país veciño.

Pero non remata aquí a troula, a partir das 00:00 horas terá lugar a queimada popular de balde e un par de horas máis tarde o churrasco.  E por se o tempo non acompaña haberá unha gran carpa. Bos ingredientes para o bandullo e o bailoteo en Oa, festa popular de calidade.