A historia dos Kinks será contada no cine en “You Really Got Me”, filme que terá a dirección de Julien Temple. A trama incidirá na rivalidade entre os irmáns Ray e Dave Davies, únicos membros presentes nos 32 anos de vida do grupo (de 1964 a 1996). O guión está asinado por Dick Clement e Ian LaFrenais, quen fixeron anteriormente, entre outros, o da película “Across The Universe”. Aínda me sigo lembrando do pedazo de concerto que deu a banda británica en 1993 no estadio de Riazor no decurso daquel excelente festival musical chamado Concerto dos mil anos. Aquel cartel tan extenso de figuras non imos velo nunca máis, polo menos mentres se manteña esta crise económica.
Robert Redford quere facer un documental sobre o Watergate, retomando os feitos presentados no filme “Todos os Homes do Presidente”, dirixido en 1976 por Alan J. Pakula. En “All The President’s Men Revisited”, Redford pretende partir do escándalo que levou á renuncia do presidente Richard Nixon e medir as consecuencias desa acción nos medios de comunicación e a política do seu país dende aquel momento tan singular na historia nacional. A estrela cinematográfica reuniuse co equipo do Washington Post encargado desa denuncia: os reporteiros Bob Woodward e Carl Bernstein xunto ao editor Ben Bradlee. O traballo afondará en como se chegou a coñecer a identidade de Mark Felt como fonte de información das históricas reportaxes e aportará novas informacións sobre o caso por parte de Woodward.
Rosario Dawson escribira xunto a David Atchison unha banda deseñada con varios álbumes na que a protagonista, unha detective que tenta resolver o misterio da morte do seu pai e, de paso, salvar Nova Iorque de practicantes de maxia negra, diaños e variados perigos sobrenaturais, leva nas páxinas do cómic as faccións da actriz. Nun primeiro momento, “Occult Crimes Taskforce” tiña intención de ser levado á pantalla grande, mais as negociacións non correron como se esperaba e o proxecto ficou parado. Unha nova vía abriu recentemente a posibilidade de que, finalmente, esta historia se vexa trasladada a unha serie de televisión. Rosario Dawson está a negociar co produtora de “The Walking Dead”, Gale Anne Hurd, para que o proxecto saia adiante, téndoa a ela como protagonista.
O escocés Kevin Macdonald dirixe un documental sobre Bob Marley, que servirá para conmemorar o trinta aniversario da morte do artista. A produción ten o apoio da familia do finado cantante. O texto do anuncio oficial desta obra indica que este é “o documental autorizado e definitivo sobre a vida, o legado e o impacto global desa verdadeira lenda”. O filme ten estrea fixada nos Estados Unidos para o 20 de abril. A imaxe que acompaña este texto é o pictograma creado polo sueco Viktor Hertz que serve como póster da película.
O director Marc Forster vai dirixir a adaptación ao cine do libro “The War Magician”, escrito por David Fisher. O traballo narra a historia real do mago Jasper Maskelyne, que traballou para o servizo de intelixencia británico durante a Segunda Guerra Mundial. A súa acción mais sobranceira foi a de empregar trucos con espellos, que lle serviron para facer invisibles formacións de tanques, pero sobre todo para agochar aos adversarios o porto de Alexandría e a Canle de Suez. Non se deron nomes de posibles protagonistas. Deste proxecto xa se leva falando hai anos e no pasado deuse por seguro na súa adaptación á pantalla, contando con Peter Weir na dirección e Tom Cruise como protagonista, mais foi outra máis desas películas que finalmente non viron a luz. Será agora a definitiva?.
August Landmesser negouse a facer o saúdo nazi nun acto de botadura dunha embarcación alemá acontecido en 1938 nos estaleiros de Hamburgo, lugar no que traballaba. Esa imaxe, co home cruzado de brazos, quedou recollida nunha foto que agora está a ser recuperada e difundida a través das redes sociais. Landmesser casou cunha muller xudía, polo que foi detido e posteriormente enviado á guerra, onde perdería a vida.
“Notas al pie de Gaza”, libro do gran autor de novelas gráficas Joe Sacco, vai poder ser visto nunha pantalla. Da dirección desta cinta de animación encargarase o canadense Denis Villeneuve, autor de “Incendios”, quen tamén colaborará no guión. O autor de comics norteamericano é autor de obras imprescindibles como “Palestina: en la franja de Gaza”, “Gorazde: Zona protegida” y “El Mediador”, publicadas por Planeta- DeAgostini. En “Notas al pie de Gaza” volta a falar sobre a lea entre palestinos e israelitas, centrándose exclusivamente nos sucesos acontecidos en 1956 e na masacre provocado polo exército xudeu.
A polémica sobre se o castor xa non representaba os valores de Canadá e era mellor substituílo como símbolo nacional polo oso polar principiou no momento na que a senadora conservadora Nicole Eaton suxeriu esa idea en público. Eaton considera a esa “rata con dentadura defectuosa” como un animal do pasado e cre que o oso reflectiría mellor o espírito da nación. O castor representa a época na que os pioneiros ían a cotío na procura da súa pel, circunstancia que provocou a expansión do país. Os detractores do oso consideran que o seu comportamento na natureza é como o dun matón. Veremos como remata esta liorta de símbolos.
The Walking Dead vai contar con máis episodios na súa terceira entrega televisiva. Se a primeira temporada constou de 6 episodios e a segunda vai ter 13, a AMC confirmou que o terceiro ano do programa terá 16 capítulos. Xa se exhibiron sete episodios da segunda temporada da serie e os restantes poderán ser visionados nos Estados Unidos a partir do vindeiro 12 de febreiro.
Quizais os creadores do videoxogo pensaron que a carga sexual era demasiado forte para o que pretendían e decidiron deixar na gaveta totalmente esquecido este anuncio do seu produto.
