O popular baixista non se abraiou cando en 1962 o selo discográfico Decca decidiu non asinarlles un contrato. “Daquela non éramos tan bos. Teríasnos rexeitado se foses dunha editora e iso foi que fixeron”, comentou McCartney nunha entrevista á radio Xfm, recollida nas súas páxinas polo diario inglés The Sun. Pouco tempo despois desa negativa, o produtor George Martin asinou coa EMI e a banda viaxou ata Hamburgo para tocar 48 veces. Todo iso ocorreu antes da chegada á formación de Ringo Starr. Na cidade alemana foron collendo experiencia e sobre todo á hora de atraer aos espectadores, “e logo dunhas semanas o clube estaba cheo. Alí aprendimos o xogo de gañarlle á audiencia e tamén unha manchea de cancións que nos serviron para ter un repertorio amplo cando voltamos a Inglaterra”. O ex-beatle comentou que nada supera á adrenalina que se sinte cando se toca nun pub. “Gustaríame ir a un pub e dicir: ‘Permiso, podo tocar?’. Encantaríame facer iso”, indica McCartney.
